Taylor Swift គឺជាតារាចម្រៀង អ្នកនិពន្ធបទចម្រៀងសញ្ជាតិអាមេរិក ដែលទស្សនិកជននៅទូទាំងពិភពលោកបានកើតសរសើរ។ ប៉ុន្តែ តើប្រិយមិត្តដឹងថា នាងមានប្រវត្តិយ៉ាងណាដែរឬទេ?
| ឈ្មោះ | ថ្ងៃខែឆ្នាំកំណើត | ទីកន្លែងកំណើត | កម្ពស់ | ភិនភាគ និងចំណង់ចំណូលចិត្ត |
| Taylor Alison Swift | ១៣ ធ្នូ ១៩៨៩ | រដ្ឋ Pennsylvaniaសហរដ្ឋអាមេរិក | ១៨០ សង់ទីម៉ែត្រ | សក់ពណ៌ទង់ដែង,ចូលចិត្តស្បែកជើងកវែងបែប Cowboyនិងដេញហ្គីតា |
ជីវប្រវត្តិសង្ខេប
Taylor Swift មានឈ្មោះពេញថា Taylor Alison Swift។ នាងកើតនៅថ្ងៃទី ១៣ ខែ ធ្នូឆ្នាំ ១៩៨៩ នៅ Reading រដ្ឋ Pennsylvania សហរដ្ឋអាមេរិក។ ឪពុករបស់នាង Scott Swift គឺជាអ្នកផ្ដល់ប្រឹក្សាផ្នែកហិរញ្ញវត្ថុនៅក្រុមហ៊ុន Merrill Lynch ចំណែកឯម្ដាយរបស់នាងមានឈ្មោះ Andrea គឺជាមេផ្ទះម្នាក់ដែលកាលពីមុនគាត់ធ្លាប់ធ្វើជាអ្នកប្រតិបត្តិផ្នែកទីផ្សារម្នាក់។ Andrea រស់នៅសិង្ហបុរីរយៈពេល ១០ ឆ្នាំមុនពេលនាងបានប្ដូរទៅរស់នៅទីក្រុង Texas។ ម្ដាយរបស់ Swift មានជំនឿថា ឈ្មោះរបស់ Swift នឹងជួយឲ្យនាងបានទទួលភាពជោគជ័យនៅក្នុងពិភពសិល្បៈ។ Swift មានប្អូនប្រុសម្នាក់ឈ្មោះ Austin ដែលបានចូលរៀននៅក្នុងសាកលវិទ្យាល័យ Vanderbilt។ នៅពេល Swift មានអាយុ ៩ ឆ្នាំ គ្រួសាររបស់នាងបានប្ដូរទីលំនៅទៅរស់នៅតំបន់ Wyomissing រដ្ឋ Pennsylvania។ បន្ទាប់មក Swift បានចូលរៀននៅមជ្ឈមណ្ឌល West Reading Elementary និងចូលរៀននៅអនុវិទ្យាល័យ និងវិទ្យាល័យ Wyomissing Area។
ចំណង់ចំណូលចិត្តដំបូងរបស់ Swift គឺនាងចូលចិត្តជិះសេះបែបអង់គ្លេស។ ប៉ុន្តែនៅពេលនាងមានអាយុ ៩ ឆ្នាំ នាងបានប្ដូរមកចាប់អារម្មណ៍ទៅលើវិស័យចម្រៀងវិញ។ នៅអាយុ ១១ ឆ្នាំ Swift បានឈ្នះការប្រកួតនៅក្នុងកម្មវិធីជ្រើសរើសអ្នកមានទេពកោសល្យក្នុងតំបន់ដោយពេលនោះ Swift បានច្រៀងបទ “Big Deal” របស់តារាចម្រៀង LeAnn Rimes។
ពីមុន Swift ធ្លាប់ឈ្នះការប្រកួតសូត្រកំណាព្យថ្នាក់ជាតិដែលពេលនោះនាងសូត្រកំណាព្យមួយបទមានចំណងជើងថា “Monster in My Closet” ប៉ុន្តែបច្ចុប្បន្ននាងមិនបានបន្តការនិពន្ធ ឬ សូត្រកំណាព្យទៀតទេ ដោយនាងចាប់ផ្ដើមផ្ដោតទៅលើការនិពន្ធបទចម្រៀងវិញ។
នៅពេល Swift មានអាយុ ១៤ ឆ្នាំ ឪពុករបស់នាងក៏ត្រូវក្រុមហ៊ុន Merrill Lynchប្ដូរឲ្យទៅធ្វើការនៅការិយាល័យ Nashville ដូច្នេះគ្រួសាររបស់នាងក៏ត្រូវប្ដូរទីលំនៅម្ដងទៀតទៅរស់នៅ Hendersonville រដ្ឋTennessee សហរដ្ឋអាមេរិក។ Swift បាននិយាយថានោះគឺជាការលះបង់ដែលមិនគួរឲ្យជឿមួយរបស់នាងចំពោះគ្រួសារ។ នាងបន្ថែមទៀតថា ឪពុកម្ដាយរបស់នាងសុខចិត្តប្ដូរទៅរស់នៅសហគមន៍ល្អមួយជាជាងផ្ដល់ឱកាសឲ្យនាងក្លាយជាតារា។ នៅ Tennessee Swift បានចូលរៀនវិទ្យាល័យ Hendersonville បន្ទាប់មកនាងក៏បានប្ដូរទៅរៀននៅសាលាគ្រិស្តសាសនាឯកជន Aaron ។Swift ទទួលបាននិទ្ទេស A គ្រប់មុខវិជ្ជា ហើយនាងបានទទួលសញ្ញាប័ត្រថ្នាក់វិទ្យាល័យក្នុងឆ្នាំ ២០០៨។
អាជីពនិងភាពជោគជ័យ
ដោយសារតែឃើញពីទេពកោសល្យរបស់Taylor Swift លោកScott Borchetta ដែលជាម្ចាស់ផលិតកម្ម Big Machine Recordsបានទទួលឲ្យ Taylorចុះកុងត្រាជាតារាដំបូងជាមួយផលិតកម្មរបស់លោក។ អាល់ប៊ុមដែលបានចេញដំបូងរបស់នាងមានចំណងជើងថា “Taylor Swift” ចេញនៅខែតុលាឆ្នាំ២០០៦ហើយទទួលបានការគាំទ្រជាវិជ្ជមាន។ បទចម្រៀង ”Our Song” នៅក្នុងអាល់ប៊ុមរបស់នាងបានធ្វើឲ្យ Swift ក្លាយជាតារាចម្រៀង country ទទួលបានចំណាត់ថ្នាក់លេខ១វ័យក្មេងបំផុត។
នៅឆ្នាំ២០០៨ Taylor Swift បានចេញអាល់ប៊ុមមួយទៀតដែលមានចំណងជើងថា ”Fearless” ដែលមានបទចម្រៀងនាំមុខ “Love Story” ហើយបទនេះបានក្លាយជាបទចម្រៀងដែលលក់ដាច់បំផុតទី២នៅក្នុងប្រវត្តិសាស្ត្របទចម្រៀងចង្វាក់ country។
បន្ទាប់មកក្នុងឆ្នាំ២០០៩ នាងបានចេញបទ “You Belong with Me” ដែលជាបទធ្វើឲ្យ Swiftបានទទួលជោគជ័យយ៉ាងខ្លាំងក្លាបំផុតនៅក្នុងអាជីព។ នៅក្នុងខែកញ្ញាឆ្នាំ២០០៩ Swift បានក្លាយទៅជាតារាចម្រៀងចង្វាក់ countryដំបូងគេបំផុតដែលទទួលបានពានរង្វាន់ MTV Video Music Award ជាមួយនឹងបទ “You Belong with Me”។ នៅខែវិច្ឆិកាឆ្នាំ២០០៩ Swift បានក្លាយជាតារាក្មេងជាងគេបំផុតក្នុងចំណោមស្ត្រីទាំង៦អ្នកដែលត្រូវបានសមាគមតន្ត្រីចង្វាក់ country (Country Music Association)ផ្ដល់រហស្សនាមថា ”Entertainer of the Year”។
នៅខែតុលាឆ្នាំ២០១០ Taylor Swift បានចេញអាល់ប៊ុមលើកទី៣របស់នាងដែលមានចំណងជើងថា”Speak Now” ដែលមានបទចម្រៀងគ្រប់បទសរសេរដោយនាងផ្ទាល់។ ដើម្បីបង្កើនភាពល្បីល្បាញទៅលើ អាល់ប៊ុម “Speak Now” របស់នាង Swift បានធ្វើការប្រគំតន្ត្រីទស្សនាចរ នៅទ្វីបចំនួន៤ក្នុងនោះ ការប្រគំនៅក្នុងទ្វីបអាស៊ីមានចំនួន ៧កន្លែង ការប្រគំនៅក្នុងទ្វីបអឺរ៉ុបចំនួន ១២កន្លែង ៨០កន្លែងនៅអាមេរិក និង១២នៅក្នុងទ្វីបអូស្ត្រាលីដែលចំណាយពេលសរុបទាំងអស់១៣ខែ។
នៅក្នុងឆ្នាំ២០១២ Taylor Swift បានថតបទចម្រៀងចំនួន២បទសម្រាប់ចាក់ក្នុងរឿង The Hunger Games ដែលបទទាំងនោះមានចំណងជើងថា Safe & Sound និង Eyes Open។ ថ្មីៗនេះកាលពីខែឧសភា ២០១២ Swift បានថតបទចម្រៀងជាមួយនឹង B.o.B ដែលមានចំណងជើងថា “Both of Us” ។
ពានរង្វាន់Swift ទទួលបានពានរង្វាន់ Grammy ចំនួន ៦ ពានរង្វាន់ American Music ចំនួន ១០ ពានរង្វាន់ Country Music Association ចំនួន ៧ ពានរង្វាន់ Academy of Country Musicចំនួន ៦ និងពានរង្វាន់ BMI ចំនួន ១៣។ ក្នុងនាមជាអ្នកនិពន្ធបទចម្រៀង Swift បានទទួលងារកិត្តិយសដោយ Nashville Songwriters Association និង the Songwriters Hall of Fame។
